12‏/09‏/2011

البرادعي.. رئيسا ؟

صورةكتبت هذا الموضوع في 2009 يوم عودة البرادعي و الاستقبال الحاشد له في مطارالقاهرة , بعد إعلانه رغبته في التعديل السياسي.

"اهتف اهتف علّي الصوت...اللي هايهتف مش هايموت. مصر فيها ألف بديل... و البرادعي أهه الدليل. الشعب المصري كله بيدعي... يبقى رئيسنا البرادعي". 

بهذه الهتافات استقبل مئات المصريين د.محمد البرادعي في مطار القاهرة, منذ ساعات قليلة. كنت هناك.. و تأملت الموقف عن كثب, فاسمحوا لي أن أشارككم هذه الخواطر التي جالت بخاطري هناك.


1- كانت المرة الأولى التي أرى فيها علم مصر , يرفع في "حاجة عليها القيمة".. فالتفوق في كرة القدم ليس من (القوة الشاملة) للدول, أي أن العالم لن يحترمك أو يزيد دخلك القومي لمجرد أن فريقك بيلعب كويس.

2- التصميمات و الملصقات التي استخدمت صورة البرادعي , تذكرني بالصور التي صاحبت حملة أوباما.. مما يدل على أن هؤلاء الشباب لهم حس فنّي رفيع, أو على الأقل أرقى من اخوانّا بتوع"من أجلك أنت!"


3- في المطار رأيت عناصر من الإخوان و من حركة 6 ابريل و رأيت أجانب يهتفون باسم مصر و البرادعي و رأيت فنانين و كتاب و صحفيين....إلخ . هذا التأييد المعلن لا يعني إلا أن الناس تبحث عن حلم افتقدناه طويلا في ظل النظام المفلس فكريًا

4- البرادعي شخصية دولية مرموقة, يصلح من وجهة نظري لأن يكون رئيسا لمصر في "مرحلة انتقالية" يتغير فيها الدستور لتتوزع السلطات بشكل محترم قابل للتداول السلمي للسلطة و ليس احتكارا لحزب واحد أيّا كان. لا أعرف السبب الحقيقي للهجوم على البرادعي كشخص.. فرئاسة الدولة تحتاج إلى خبرة في مجالي الإدارة و العمل السياسي و علاقات دولية قوية.. و هي عناصر متوفرة عند البرادعي. فرئاسة الهيئة الدولية للطاقة الذرية يحتاج إلى قدرات إدارية متميزة أجمع العالم كله أنها عند البرادعي, كما أنها مؤسسة تتعامل مع السياسات الدولية, كما أنه درس اصلا القانون الدولي... فما الذي يعيبه ؟هل تريدون أن يكون الرئيس (خبرة في رئاسة الجمهوريات)؟ أم تريدونه ابن رئيس عشان يكون خبرة؟ لابد من التغيير.. العقلية الحالية أوصلتنا لما نحن عليه.. فلماذا نريد الاستمرار بها؟

5- من كان يصدق أننا سنرى لافتات كهذه ترفع و هتافات كهذه تقال أمام شاشات التلفزيون؟ لقد تعامل الأمن مع المتجمعين بشكل محترم جدا.. و هو شيء رأيته بعيني.. لذلك أعتقد أن التغيير يحدث فعلا أيها السادة.. مصر تتحرك للأمام بعد أن كانت مغطاة بالأتربة و الصدأ و خيوط العنكبوت لعقود طوال..ربما يكون أعظم إنجاز للرئيس مبارك هو أن يكون أول من يحقق تداول السلطة في العالم العربي.. عندها سيسجل التاريخ اسمه بحروف من نور كصاحب نهضة عظيمة لن تنساها له مصر أبد الدهر.. فهل هذا هو الرئيس مبارك؟

6- لم يخرج البرادعي من صالة 3 بسبب الزحام , لكنه خرج من باب آخر, و جاء بسيارته كي يمر بين الناس الذين انتظروه منذ الصباح. ربما لم يكن الجميع مقتنعين بإمكانية وصول د.البرادعي لمنصب الرئاسة أو حتى تغيير الدستور.. إلا أن الجميع التفوا أخيرًا حول حلم قومي واحد, و إن كان مستحيلًا في نظر الكثيرين.
فهل نستطيع؟!


د.شريف عرفة

08‏/09‏/2011

ما هي الليبرالية ؟ بقلم: د.شريف عرفة


 رشح المفكر الكبير أحمد لطفي السيد (مؤلف العبارة الشهيرة: اختلاف الرأي لا يفسد للود قضية) نفسه لعضوية البرلمان.. فلجأ منافسه في دائرة الدقهلية لحيلة غريبة.
 أشاع المرشح وسط البسطاء أن منافسه رجل ديموقراطي،
و أن الديموقراطية تعني: الإباحية و الانحلال..
فكان أن خسر أحمد لطفي السيد الانتخابات!
كثير منا شاهدوا لقطة مشابهة في فيلم أحمد زكي (البداية)..
و التي لم تكن خيالية إذا هذا الحد.
 


يتبادر هذا في ذهني مباشرة حين يسألني أحد على الفيس بوك : إنت ليبرالي ؟

أكتب هذا الموضوع -شديد التبسيط - كي أوضح ما هي الليبرالية كما أراها.


ما معنى الليبرالية ؟
=========
الليبرالية مشتقة من الحرية Liberation.. ..أي أنك حر في تصرفاتك و حر في أن تفعل ما شئت مادمت لا تؤذي الآخرين.
حتى في كرة القدم (الليبرو) هو المدافع الحر غير الملتزم بمراقبة المهاجمين
. أنت تختار كيف تعيش حياتك كما تشاء ، بشرط: أن تحترم حرية الآخرين كما تريدهم أن يحترموا حريتك..

و ينطبق هذا على جوانب الحياة الاجتماعية و الاقتصادية و السياسية


مثال :
..في الولايات المتحدة الأمريكية ، من حقك أن تغير دينك للإسلام و أن تبني المساجد ..و لو كنت امرأة فمن حقك أن ترتدي الحجاب (أو حتي النقاب).. فحرية العقيدة حق محمي بالدستور الأمريكي نفسه.
لكن: يجب أن تحترم من يختار الديانة البوذية مثلا.. و تحترم حقه في ممارسة تعاليم دينه، طالما لم يصادر على حريتك في ممارسة دينك


الحدود الأخلاقية لليبرالية
===========
هل تدعو الليبرالية للتحرر من الأخلاق و القيم ؟

من الواضح أن الليبرالية تتشكل حسب أخلاقيات و ثوابت كل مجتمع.. ففي أمريكا و كندا و أغلب دول أوروبا ، البغاء (الدعارة) ممنوع بحكم القانون.. و لا يعتبر هذا حرية شخصية.

في التلفزيون الأمريكي المجاني (الذي تراه دون دفع اشتراك) لا يسمح فيه بالكلمات البذيئة أو المشاهد الإباحية أو الدموية.. كي لا يجبر الآخرين على مشاهدتها.. لكن من حقك أن تشترك في القناة التي تقدم لك هذه الأشياء.. انت حر.

في المجتمعات الليبرالية ،هناك حدود أخلاقية تتشكل طبقا لقيم المجتمع نفسه.. و ليست الحرية مطلقة دون أي قيود أخلاقية كما قد يتصور البعض.


الدين و الليبرالية :
========
أحيانا يصطدم الدين بالحرية الشخصية .. إلا أن الدين ينتصر في كثير من الأحيان حين تمارس المؤسسات الدينية ضغوطا انتخابية و إثارة للرأي العام..
و هذا جزء أصيل من الليبرالية : حرية الدعوة لمذهبك الفكري لكسب المزيد من المؤيدين.

أمثلة في الولايات المتحدة:

أبحاث الخلايا الجذعية: تتعرض هذه الأبحاث لمنع قانوني نتيجة ضغوط مؤسسات دينية .. لأن الخلايا اللازمة للأبحاث يتم الحصول عليها من الأجنة الميتة.
الإجهاض: تحاول المؤسسات الدينية منع قوانين الإجهاض ، و هو ما يؤيده الحزب الجمهوري.
و أشهر الأمثلة، زواج الشواذ: و هو ممنوع في الولايات الأمريكية كلها ماعدا خمس ولايات (من خمسين) و تتعرض لضغوط المؤسسات المسيحية و اليهودية لمنعه..
الطلاق و المواريث: بعض الأحكام القانونية غير متوافقة مع الإسلام (كالطلاق و المواريث).. لذلك من حق المسلم في أمريكا - أو صاحب أي طائفة دينية - أن يكتب شرطا في عقد الزواج أو وصية قبل وفاته، بتطبيق شريعته في هذه المسائل، و يتم العمل بها بحكم القانون..

أنت حر !

هل الليبرالية كفر بالله ؟
===========
الليبرالية ليست مبدأ دينيا.. لكنها تعني حريتك في الاعتقاد و في ممارسة ما تؤمن به ، مع احترام معتقدات الآخرين و اختياراتهم في الحياة.
مثلا: من حق زوجتك أن ترتدي الحجاب ، و من حق زوجة جارك ألا ترتديه .. من حقك أن تكون متدينا ، و من حق غيرك أن يكون ملحدا
لأن كل شخص مسئول عن اختياراته.


هل الليبرالية تتعارض مع الإسلام ؟
===============

هناك كثير من المسلمين يوصفون بأنهم (ليبراليون إسلاميون)... أي أنهم يؤمنون بالإسلام، و في نفس الوقت بمبادئ الليبرالية: قبول الآخر و الحرية المطلقة و المساواة.. فليس عندهم مشكلة -مثلا- في تولي امرأة الحكم، أو أن يحكمهم شخص غير مسلم.. طالما كان كفئا لهذا المنصب.

لذلك تختلف بعض آراؤهم مع التفسيرات التقليدية للدين.. فيرى الليبراليون أن التفسيرات و آراء العلماء تحترم، لكنها لا تمثل الإسلام نفسه بل تمثل فهم هؤلاء العلماء للأسلام، طبقا لزمانهم و بيئاتهم و خلفياتهم المعرفية..
فهم يؤمنون بقداسة النص القرآني و الحديث النبوي، أما فتاوى و شروح العلماء فليست مقدسة أو منزهة من الخطأ بل هي اجتهادات تخطئ و تصيب. و يدعون لتفسير النصوص في سياق العصر الحديث، و ليس تغيير العصر كي يناسب التفسيرات القديمة.

و يرون أن المجتمع لابد أن يكون حرا ، و ليس مقيدا بفهم فئة واحدة للدين.. فكل شخص يمكنه أن يؤمن و يتدين أو أن ينحل خلقيا، فهذا شأنه.. طالما لم يتعرض للآخرين بأذي أو ضرر أو تضييق لحريتهم.

يرى البعض أن الإسلام يكفل كل هذا ، بينما يرى البعض الآخر أن هذه حرية مفرطة تتعارض مع الدين...
لذلك تم تكفير من أتوا باجتهادات فكرية تختلف عما هو متعارف عليه ، مثل طه حسين.


كلمة أخيرة
=====
الليبرالية مجرد أداة.. من الممكن أن تشكل بها المجتمع بأكثر من طريقة ، طبقا للمجتمع نفسه و قيمه و حضارته..
بالنسبة لي، أرى أن الليبرالية ببساطة هي: من شاء فليؤمن و من شاء فليكفر !
أنت حر !

27‏/08‏/2011

(القاموس) ... لعمر طاهر

المأذون: ضابط مرور مهمته أن يجعل حياة الرجل (اتجاه واحد).
الديمقراطية: أن تشترى التليفزيون الذى تختاره زوجتك بشرط أن تجعل الريموت كنترول فى يدك طول الوقت.

التصدير: أن تصدر الحكومة الغاز لإسرائيل ، و تصدر للشعب (الطارشة).
الدبلوماسية : أن تتذكر جيدا تاريخ ميلاد زوجتك ولا تتذكر عمرها.
الإحتكار : أن تكون شخصا ابن (عز) و أعصابك (حديد).
العزوبية : (العذاب ) الذى لا يعرف الرجل قيمته إلا بعد أن يتزوج.
الشفافية : المبدأ الذى تختار به الزوجة قمصان نومها فى شهر العسل .
الخصخصة : أن يتزوج زير النساء.
النزاهة : أن تسرق و (ماتتمسكش).
الحرب الباردة : الحرب بين الزوجين على اللحاف فى عز البرد.
معاهدة السلام : أن تختار مطعما تتناول فيه العشاء أنت و زوجتك ، بحيث تذهب أنت الأحد والثلاثاء و تذهب

هى الخميس و الأثنين.
شباب الخريجين : الشباب الذين خرجوا 

و (ماعرفوش يدخلوا تانى ).
التطبيع : أن تصنع علاقة طبيعية مع (واحد مش طبيعى ).
الفكر الجديد: مجرد remix حيث يتم عزف اللحن القديم نفسه ولكن بآلات جديدة.
المعارضة: أشخاص يعرفون جيدا أن الهدف الذى سيحرزونه قد يحسب عليهم وليس لصالحهم، لذلك فهم يفضلون دائما أن يشوطوا فى (العارضة).
مجلس الشعب : مسرح يجلس فيه المُلقن بالعكس، ويقوم فيه الممثلون بالتصفيق لأن الجمهور غير مهتم.
التمثيل المشرف : أن تصحو من النوم فتجد على وجه زوجتك ابتسامة عريضة!
الحصانة: شهادة تعفيك من المسائلة القانونية بالضبط مثل شهادة معاملة الأطفال.
الموبايل : التطور الطبيعى للمهمة الحريمى الخالدة..نقل الكلام.
القبلة : أحسن طريقة تسكّت بيها واحدة ست.
القدر و الحظ والنصيب : القدر أن تجد الحب ، و الحظ أن تتزوج ممن تحب ، والنصيب أن تؤمن بعد فترة أن ( الحب حاجة والجواز حاجة تانية).
أم كلثوم و فيروز: الفرق بين الخلفية الموسيقية لقصة الحب ، و قصة الحب نفسها.

نيران صديقة : تقرير رئيس الجهاز المركزى للمحسابات عن اداء الحكومة .
المدن الجديدة : كيس الجلوكوز الذى يتم تعليقة قريبا من جسد المريض.
الكافيهات : أماكن معمولة علشان الناس تروح تتفرج فيها على بعض.
المسلسلات العربية : الضلع الذى حول مثلث (الجهل و الفقر والمرض ) إلى مربع.
مجانية التعليم : الغريب أن الحكومة ترى أن التعليم يجب أن يكون مجانيا ، بينما الشعب يرى أن (ماحدش بيتعلم ببلاش).
الحب : من يبحث عن تعريف للحب ، يبحث عن تعريف ل (الله)، كل ما نعرفه عن الله أنه جميل..وكذلك الحب.
انفلونزا الطيور : لسبب غير مفهوم ..بعد أن قامت الطيور بالقضاء على الكفار (اللى كانوا عايزين يهدوا الكعبة)..أصبحت تقوم الآن بالقضاء على الغلابة (اللى عايزين يبنوا مصر).
أسعار البنزين : طبيعى جدا أنها كل يومين (تولّع).
الوفاة الأكلينيكية: اللحظة التى تتحول فيها فى عيون زوجتك من (ذكر) المنزل الى( لا والله الحاج لسه نايم).


لــ عــمــر طــاهـر

24‏/08‏/2011

ربما نمضى قدما

ربما ينبغي أن تفكر فيما يمكن أن تفعله غدا..لا فيما حدث أمس .. !

ربما يكون علينا أن نمضى قدما ... ونبدأ من جديد ... لنتعلم من أخطاء الماضى .. فنبني بها المستقبل .. !

ربما يكون الحب شيئا آخر ... غير الذي كنا نعتقد .... !

ربما علينا أن نبحث عن القوة داخل قلوبنا ... وأن نؤمن .. فقط نؤمن .. بأنه لا وجود لما يسمى بالضعف.. !

ربما حين تنظر إلى السماء ترى نجوما عالية ... تراها بعيدة ... جميلة ... لأنك فقط من يظنها بعيدة !

ربما يجب أن تكف عن الوقوف صامتا أمام الخطأ ... اصرخ بها ... وقل لا ا ا ا ا.. !

ربما نجد في البعد قربا ...  !

ربما على أن أخرج من عالم الحزن ... أقدم وعودا لنفسي .. أكف عن لومها .. عن كرهها ... وأحاول أن أتغير ... !

ربما على أن أعتكف في صومعتي .. تلك التي ما كدت أخرج منها ... حتى اشتقت إلى العودة إليها ... !

ربما عليك أن تكف عن العبث ... وتبدأ لحظة بجدية ... ولو لمرة في حياتك ... !

ربما يكون الفراق صعبا ... لكنه الصواب .... !

وربما نسخط على الأحداث ..... لكنه القدر .... !

ربما على أن أذهب ... لأعيد بناء صومعتي ... وأستكين بها ... إلى أن يأتي حبيبي ... ليخرجني بقوة  من عالم الصمت .. فلا أخجل من إخفاء دقات قلبي .. ولا احمرار وجهي وأنا أنطق بكلمات الحب ...!

ربما .. نمضى قدما


22‏/08‏/2011

جيل الثورة

أكيد ده لسه مدخلش التعليم اللذيذ بتعنا اللي بيفقد الإنسان جميع حواس الشعور و الفهم .. و أكيد طبعا مبيكلش فووول
 

21‏/08‏/2011

بلد بدون رئيس جمهورية وبدون داخلية وبرلمان = معجزة


عبارات بالغه الدلالة والايحاء .. قال ستيف فارس رئيس شركه اباتشى العالمية للبترول: اليوم مررت على كوبرى 6 اكتوبر . كنت أتطلع الى القاهره، راقبت حركه الناس . وتابعت بلمحات سريعة مايحدث فى الشوارع قلت لزوجتى التى ترافقنى رحلة المرور فوق 6 اكتوبر .

مصر دى بلد غريبة كل الغرابة . بلد ليس بها رئيس جمهورية . وليس بها برلمان . وليس بها وزارة داخلية . وليس بها سلطة واضحة المعالم .. وفى غياب كل هذه السلطات الحياه تسير بسلاسه .. كما لو كانت الايام عاديه ..وليست ايام ثوره .. هذه معجزه . مصر بلد معجزه. اعتقد ان المخزون الحضارى لدى المصرين هو الذى يحقق المعجزه .. وفى يقينى لو أن أمريكا تمر بالحاله التى تمر بها مصر .. أى مفيش رئيس جمهورية ولا رئيس برلمان ولا وزاره داخلية ولا سلطه قويه . لو حدث هذا فى أمريكا .. لسالت الدماء .. وتفجرت كالانهار ..

هنا يستذكر ستيف ما حدث فى نيويورك على سبيل المثال: أنقطع التيار الكهربائى ساعه .. فانفجرت أعمال العنف والسرقه على أوسع نطاق .

وأضاف ستيف : على المصرين أن يتفاخروا ويتباهوا بمخزونهم الحضارى الذى يسمح لهم باستمرار الحياه فى غياب السلطة .

كان ستيف فارس يتحدث أمام مجلس الاعمال المصرى الامريكى الذى عقد أجتماعا مع أعضاء غرفة التجارة الامريكيه صباح اليوم .

واه يا عبد الودود


واه يا عبد الودود يا للي رابض ع الحدود
و محافظ عالنظام كيفك يا واد صحيح


عسى الله تكون مليح وراقب للأمام
أمك عتدعي ليك وعتسلم عليك

وتقول بعد السلام خليك ددع لابوك جدع
لا يقولوا منين دابوك جابوك

ويمصِّخوا الكلام

واه يا عبد الودود
عقلك وانته خابر كل القضيَّة عاد
ولسّه دم خيّك ما شِرباش التراب


حسّك عينك تزحزح يدك عن الزناد
خليك يا عبده راصد لساعة الحساب

آن الأوان يا ولدي ما عاد الاّ المعاد
تنفضّ الشركة واصل وينزاحوا الكلاب

إن كنت ودّ أبوك تديب لي ثار أخوك
والأهل يبلّغوك دميعاً السلام جميعاً


واه يا عبد الودود
كيفك وكيف زمايلك عسى الله طيبين
خالك زناتي جايلك ضمن المطّوعين

واختك تطلع يوماتي ع المِستِشْفى القديمة
حاكم عيمرنوها في العَرْكَة تكون حكيمة

ومحمّدين موافي يتعلم المطافي
ويقولّك شِد عزمك ويقلك العوافي

ومنِهْنا القرايب والعيلة والعيال
عيبلغوك سلامهم ولتمّة الرِّجال


وآخر الكلام نقولك في الختام
الله يصون بلدنا ويحرس السلام

والدك / حسن محارب
(غفير برج الحمام)

البطل أحمد الشحات

 أحمد الشحات: أنزلت علم إسرائيل مدفوعًا بوطنيتي وإحساسي بالمسئولية
قال الشاب أحمد الشحات، الذى أنزل علم إسرائيل من فوق سفارتها بالجيزة فجر اليوم "الأحد"، إن "ما فعلته جاء بدافع من وطنيتى وإحساسى بالمسئولية تجاه بلدى، وضرورة أن أفعل شيئا ردا على العدوان الإسرائيلى الذى تسبب فى مقتل جنود مصريين بسيناء".
وأكد الشحات -فى مؤتمر صحفى بنقابة الصحفيين اليوم "الأحد"- أنه لا ينتمى إلى أى حزب أو تيار سياسى، وأن مافعله كانت دوافعه وطنية، وقال "هدفي كان إيصال رسالة مهمة إلى الإسرائيليين وهى أن الشباب المصرى سيفعل أى شىء للزود عن بلده".
وروى الشحات كيف استطاع أن يتسلق العمارة، ويصل إلى مقر السفارة الإسرائيلية ويُنزل العمل الاسرائيلي.. وقال: "إن ماتعرضت له أثناء عملية الصعود والهبوط بعد نجاحى فى إنزال العلم كان أهم إحساس فى حياتى، أن أجعل كل المصريين يشعرون بشىء من الارتياح بعد استشهاد جنودنا على الحدود مع إسرائيل".
يذكر أن أحمد الشحات شاب من مدينة الزقازيق بمحافظة الشرقية، حاصل على دبلوم فنى صناعى ويعمل نقاشا بالقاهرة، ويعول أسرته بعد وفاة والده منذ سنوات والتى تتكون من ثلاث شقيقات وأخيه وأمه.

17‏/08‏/2011

مصر «حامل» فى توأم


دولة «الورق» ودولة «الخشب» 
إلى من يهمه الأمر إن رُحت مرة تزور عش الهوى المهجور سلم على قلبى، فكل شوارع مصر الآن أصبحت اتجاهين حتى الأزقة التى لا تٌرى إلا بالمجهر لأن عندنا الآن دولتين: دولة «الورق» ودولة «الخشب»، الأولى تبنى حياة ديمقراطية على الورق، والثانية تقيم أكشاكاً خشبية على الأرصفة، وكلتاهما وراءها رجال وأموال، هناك دولة موازية الآن تقام على أرض مصر، الأولى منشغلة بالمبادئ الدستورية وفوق الدستورية وتحت الدستورية وقانون الانتخابات وبرامج الأحزاب، وبسبب السلحفاة البرية عندما تنتهى من الكتابة سوف تفاجأ بوجود دولة أخرى تماماً لا يمكن تطبيق المكتوب عليها..

فى مصر دولتان تقامان الآن: إحداهما بطيئة ونظرية وفى المكاتب، والثانية سريعة وعملية وفى الشوارع، وتصديقاً لكلامى فإن العلماء اكتشفوا أمس فقط، وبعد أربعين مليون سنة، أن الديناصور لم يكن يبيض ولكنه يلد، بعد أن علم أن البيض يحتاج إلى رقاد وفقس وفترة حضانة مثل الدولة الأولى، لكن الولادة سريعة وبدون «داية» مثل الدولة الثانية، والغريب أن الدولة الأولى تنشئ «الدستور» باسم الشعب، والدولة الثانية تبنى «الأكشاك» باسم الشعب، لذلك فإن الصراع فى مصر الآن بين مواد «الدستور» ومواد «البناء»..

صدقونى الشعب فى «وادى» والنخبة فى «نادى» والفجوة متسعة ليبيض الديناصور.. والمطلوب تقليل فترة التبويض حتى لا نتحول من دولة بلا دستور إلى دستور بلا دولة.. وعندما قالوا لجحا «عد موج البحر» قال إن عدد «الأكشاك» أكثر من عدد «الأحزاب»، الفائدة الوحيدة لما يحدث الآن هى أننا ممكن أن ندخل بطولة أفريقيا بدولتين: الدولة الثانية تخرج من التصفيات وتدخل «الكشك» بسرعة، والدولة الأولى تنهى التصفيات والأدوار التمهيدية وقبل النهائى والنهائى والبطولة ويتم تسليم الكأس وترحل الفرق ويسافر المتفرجون و«هيه لسه بتبيض».. سلامتها أم حسن.. هل يعرف علماء البيولوجى مدة «حمل» دولة «حامل» فى توأم؟!

كاتب صحفى مصري مرموق، وُلد مع ثوره يوليو تخرج في الكلية الحربية وكان أحد ضباط حرب أكتوبر, قائداً لسرية في الفرقة 18 بقيادة اللواء فؤاد عزيز غالى.. شارك مع فرقته في تحرير مدينة القنطرة شرق.. درس القانون في كليه الحقوق والفلسفة في كليه الآداب يكتب القصه القصيره والشعر وله أعمال منشوره يعمل كاتباً صحفياً وتنشر مقالاته في عدة صحف ويُعد الآن أحد أهم الكُتاب الساخرين في مصر أبتدع مدرسة جديدة في فن الكتابة الساخرة تعتمد على التداعى الحر للأفكار والتكثيف الشديد وطرح عدداً كبيراً من الأفكار في المقال الواحد وربطها معاً بشكل غير قابل للتفكيك بحيث تصير المقالة وحدة واحدة شديدة التماسك على الرغم من إحتواءها على أفكار منفصلة عن بعضها, كما يتميز أسلوبه بإحتواءه على الكثير من التوريات الرائعةالتي تشد إنتباه القارئ وتجعله منتبهاً حتى نهاية المقال كما أنها تفتح مداركه على حقائق ربما غابت عنه.' كانت بداياته في جريده القاهرة الصادرة عن وزارة الثقافة المصرية ويرأس تحريرها الأستاذ صلاح عيسى. يعمل كاتباً صحفياً وتنشر مقالاته في عدة صحف منها جريدة الأهالى وجريدة القاهرة وجريدة العرب القطرية وله عامود يومى مقروء على نطاق واسع بعنوان "تخاريف" في المصري اليوم.' صدر له عن دار العين كتاب "مصر على كف عفريت", وله تحت الطبع كتاب "إستقالة رئيس عربى

البنات

البنات أمثال الفاكهة ،، ليس كل لون جميل يحمل تحته طعم جميل
اللون والطعم يكسبان كل فاكهة ميزة فلا توجد فتاة قبيحة لأن الطعم الجيد "الروح" يجعل اللون "الشكل" لا قيمة له.

16‏/08‏/2011

التويتة القاتلة

 
تويتة تترجم بلغة الحواسيب إلى «تغريدة». تويتة نسبة إلى موقع «تويتر»، وهو موقع اجتماعى، يعتمد على اختصار الفكرة فى 140 كلمة، ويمكنك متابعة «تويتات» الآخرين. المهم يا سيدى بلا هذا الملل، إليك الخبر السعيد: مثلت الناشطة أسماء محفوظ أمام النيابة العسكرية، بتهمة كتابة «تويتة»، وصدر قرار بالإفراج عنها بكفالة 20 ألف جنيه! عشرون ألف جنيه مصرى للإفراج عن مواطنة كتبت خاطرة على موقع من مواقع التفاعل الاجتماعى، ومتى حدث ذلك؟ بعد الثورة التى شاركت فيها أسماء محفوظ منذ اليوم الأول، وكانت تشارك فى كل الوقفات الاحتجاجية السابقة على يوم 25 يناير.
التهمة التى يتم التحقيق فيها مع أسماء هى «التحريض»! طب اركنوا كده، وبما أن جميعنا ينتظر مصير أسماء، فآخد حقى بقى: أى تحريض الذى تتهم به أسماء، واللواء الروينى اعترف بنفسه بأنه المحرض الأول على قتل محمد محسن، وأنه مروج الإشاعات، بل أقر: «أنا اللى باقول الإشاعات اللى بتهدى التحرير وأنا اللى باهيجه». الدم يغرق كفى الروينى وما علمت عن أسماء إلا خيرا، فيتهم الروينى حركة 6 أبريل بالعمالة وينسى إنفاق المعونة الأمريكية حتى على البيادة التى يرتديها، وتقدم أسماء للمحاكمة ويفلت هو بدم محمد محسن على يديه. إنتو نسيتو نفسكم ولا إيه؟
نعم نعم.. أخاطب المجلس العسكرى.. نسيتو نفسكم ولا إييييييههههه؟ وهل كنتم ستصلون لـ«الأملة» التى ترتعون فيها الآن إلا بجهد أسماء ومن هم مثل أسماء؟ حين كان جنرالات القوات المسلحة يقولون للمخلوع وابن المخلوع وزوجة المخلوع: تمام يافندم.. كانت أسماء تقف مع بضعة شباب يحملون لافتات تندد بفساد النظام، ويواجهون جحافل الأمن المركزى، ولولا إصرار الشباب لما فتح الله عليكم، وصرتم أسياد البلاد الآن، تنعمون وتحرمون، تأمرون وتنهون، وقد باضت لكم فى القفص.
حين كان جنرالات القوات المسلحة يجلسون فى التكييف، كانت أسماء ومن هم مثل أسماء يواجهون الخرطوش، والرصاص الحى، والقنابل المسيلة للدموع، وقد هتفت أسماء، ومن هم مثل أسماء، فى تلك اللحظة: «واحد اتنين الجيش المصرى فين؟ الشرطة بتضرب فينا.. عايزين الجيش يحمينا».
ياريت كان اتقطع لسانها ساعتها.
يا للندم.. يا للندم. والله، بعقد الهاء، أننى كنت لحظتها على كوبرى 15 مايو وقلت لهم: بلاش الهتاف ده.. ده جيش مبارك. فهب الجميع مدافعين: «ماتقوليش كده، ده الجيش بتاعنا. فصدقت»، وانفعلت بشدة مع دموع ضباط الجيش الذين أشفقوا عليّا وأنا أسير فى الطريق وقد أغرق دم الشهداء والمصابين ملابسى، صدقناكم جميعا… ياريت كانت الأرض انشقت وبلعتنا ساعتها.
أسماء، ومن هم مثل أسماء. هتفوا: «الجيش والشعب إيد واحدة». أسماء ومن هم مثل أسماء وقفوا يتصدون للبلطجية يوم معركة «الجمل»، بينما الجيش المصرى يفتح الطريق للمعتدين، واحنا عملنا عبط.. بمزاجنا، إلهى كنا انشكينا فى مزاجنا. أسماء ومن هم مثل أسماء صدقوا تعهدات المجلس العسكرى بحماية الثورة وتنفيذ مطالبها، وعادوا لمنازلهم، وناموا، ونمنا جميعا، ثقة فى المجلس العسكرى.. نامت علينا حيطة.. نامت علينا حيطة. أسماء ومن هم مثل أسماء عادوا إلى الشارع مرة أخرى حين شعروا بأن قرطاسا ما يتم قلوظته لوضعهم فيه. أسماء ومن هم مثل أسماء شاركوا فى ثورة سلمية عظيمة.. ياريتها ما كانت سلمية ولا كنا شفنا وش سلمية دى إلهى يقطعها.
أسماء تحاكم بالتحريض لأنها قالت فى تغريدة على موقع «تويتر»: «لو القضاء ماجابش حقنا ماحدش يزعل لو طلعت جماعات مسلحة وعملت سلسلة اغتيالات طالما مافيش قضاء ومافيش قانون».
نعم؟ خير؟ الفتاة تحذر مما حذر ويحذر منه الجميع: إذا لم يتم القصاص العادل فستتحول إلى غابة وسيلجأ الناس إلى القصاص بأنفسهم. فلماذا تحاكم أسماء؟ ولماذا لم يحاكم الروينى حين طلب من «المواطنين الشرفاء» التصدى للمتظاهرين بالمولوتوف والقنابل المسيلة للدموع حتى مات محمد محسن؟ ولماذا لم يحاكم المجلس العسكرى حين أخاف الناس بعد بداية الثورة وادعى -كذبا- أننا مقبلون على مجاعة؟ ولماذا لم يحاكم المسؤول عن صفحة القوات المسلحة على «فيسبوك» -ههههه هم يضحك وهم يبكى- حين شكر المواطنين الشرفاء قتلة محمد محسن فى بيان عسكرى؟ ولماذا لا يحاكم الإعلام المسموم القذر الذى حرض ويحرض على الثورة والثوار ولطخت ألسنتهم النجسة بدماء الشهداء؟ ولماذا لا يحاكم عمر سليمان الذى هددنا باستخدام العنف وبانقلاب عسكرى.. وبمناسبة عمر سليمان، أين ذهبت كل البلاغات التى تم تقديمها فى عمر سليمان متهمة إياه -بالأدلة والوثائق- بالخيانة العظمى؟
يعنى إيه كوك زيرو: يعنى عمر سليمان يبقى عليه قضايا خيانة عظمى، وأسماء محفوظ هى اللى تتحاكم.

المقال من جريدة التحرير للكاتبة نوارة نجم 

15‏/08‏/2011

هنا القاهرة

هنا القاهرة الساحرة الآسِرة الهادرة الساهرة الساترة السافرة
هنا القاهرة الزاهرة العاطرة الشاعرة النيّرة الخيّرة الطاهرة
هنا القاهرة الساخرة القادرة الصابرة المنذرة الثائرة الظافرة

 
صدى الهمس في الزحمة و الشوشرة
أسى الوحدة في اللمة و النتورة
هنا الحب و الكدب و المنظرة

نشا الغش في الوش و الإفترا

 
هنا القرش و الرش و القش و السمسرة 
هنا الحب و الحق و الرحمة و المغفرة
و انا ف قلب دوامتك الدايرة بينا
بصرّخ بحبّك يا أجمل مدينة

يا ضحكة حزينة .. يا طايشة و رزينة
بحبّك و اعفّر جبيني في ترابك
و اعيش في رحابِك و أقف جنب بابك

جنايني أروي بالدم وردة شبابك
يا زينة جنينة حياتنا اللعينة
بحبّك يا بنت اللذين
 

هم دول اللي حطوا لكم مبارك في القفص

اظن بتوع منكم لله خربتوا البلد كانوا لسه من قريب بيتناقشوا في ان المجلس ناوي يعمل لمبارك جنازة عسكرية، بقول اخر، مبارك حينتحروه وما يحضرش المحاكمة
محبوسين ها؟ ازيكم يا بتوع روحوا بقى منكم لله خربتوا البلد؟ اظن انتوا نفسكم هم هم نفس الناس بتوع 1 فبراير: روحوا بقى منكم لله خربتوا البلد، ثم خرجتوا تحتفلوا يوم 11 فبراير بمنتهى البجاحة مع بقية الناس
طيب اللي حطوا لكم مبارك في القفص بدل ما يتعمل له جنازة عسكرية محبوسين... ومش عايزين منكم شكرانية، بس بطلوا كل ما تشوفوا وشهم تقولوا لهم: منكم لله خربتوا البلد.. عاملين زي اصحاب القرية: إنا تطيرنا بكم لئن لم تنتهوا لنرجمنكم أو ليمسنكم منا عذاب أليم. 
احنا مش حنهمد على فكرة، عشان هو كده، كل حاجة بتيجي بالزق والهري والنكتة والمرمطة، غير كده مافيش حاجة بتتعمل، ولولا فض الاعتصام بالقوة كان لقوا اي حجة عشان مبارك ما يجيش... والناس قلقانة عشان علاء وجمال طالعين بيضحكوا وهم ماشيين في عربية الترحيلات، واحنا مش حنستنى اما المصيبة تحصل، حنفضل كده نخرب فيها عشان ييجي الاخوة بتوع منكوا لله خربتوا البلد ينبسطوا في الاخر ويقولوا ارفع راسك فوق انت مصري
"المتهمين" بحب الوطن فيه اثار تعذيب على اجسامهم.. وانا كنت ناوية اسكت وانبسط وافرح وابوس كل المصريين حتى الفلول، بس لقيت ناس بتقول نشكر المجلس العسكري، يعني شوية ملح في عينيكم يعني.. قابض على الناس وبيعذبهم ولسه فاضضهم بالقوة ولولاهم كان زمانه عامل نفسه ميت دلوقت.. ايه في ايه؟

يا قمحنا ارجع لنا

مصر التي كانت في يوم من الأيام سلة الغلال، تحولت بقدرة قادر إلى أكبر مستورد للقمح في العالم.
مصر التي كانت تحتفل بعيد القمح وتغني له يخرج علينا ابن رئيسها ليخبرنا بأنها غير قادرة على الاكتفاء الذاتي من القمح أن أي محاولة لتحقيق هذا الاكتفاء هو محض خيال.
مصر التي كانت تطعم العالم أصبحت على شفا مجاعة
http://www.shorouknews.com/ContentData.aspx?ID=294890
لكن مصر قادرة على الاكتفاء الذاتي من القمح
http://www.masrawy.com/News/Egypt/Politics/2010/september/10/wheat.aspx
ومصر قادرة على إطعام أبنائها والعالم
حين كانت تزرع مصر القمح، لم تلقه في البحر ولا المحيط لترفع سعره، وإنما أطعمت أهلها، وجيرانها، ثم نثرت ما تبقى على الجبال والوديان لإطعام الطيور.
وستعود مصر إن شاء الله كما كانت بفكر وسواعد أبنائها
وبإرادة شعبها
مصر لم تعدم أبناء مخلصين
قامت الدكتورة زينب الديب بتجربة ناجحة في زراعة القمح
والآن تقوم ابنة مصر السيدة سكينة فؤاد حملة لتحقيق الاكتفاء الذاتي من القمح، وتقدم لنا حلولا تمكننا من تحقيق الاكتفاء الذاتي من القمح بالجهود الشعبية
ونستطيع نحن ابناء مصر أن نقوم باكتتاب يشارك فيه كل أنباء الوطن من مزارعين وغير مزارعين لتحقيق الاكتفاء الذاتي من القمح

صورة تعبيرية عن التصريحات الاخوانية العكاشية !!

هذه الصورة وجدتها اثناء تصفحى لبعض المواقع
رأيت فيها حال كثير من المنابر الاعلامية
أعطيها أهداء
للأخوان المسلمين
الجماعة الاسلامية
السلفيين والمتحدثين باسمهم
توفيق عكاشة وهالة سرحان 

.. من الكلام مايستحق فعلاً ان يلقى به الى الصرف الصحى ..

رشدوا أستهلاك المياه وأسقطوا نظام مبارك

للاسف أكتب هذه التدوينة وانا فى أشد حزن على حالنا هذا اننا الان سوف نبدء فى نسيان المقولة الشهيرة مصر هبة النيل
بسبب نظام خائن للوطن نظام أورد الوطن المهالك نظام يقودنا بحماقته الى الاقتتال على قطرة المياه كل هذا بسبب رعونته فى التعامل مع ملف دول حوض النيل الملف الذى بدائه الرئيس الرحل جمال عبد الناصر وكسب دول المنابع الافريقية فى صفنا
لكن بسبب نظام مثل نظام السادات ومبارك نظام لايعرف للوطن قيمة سنتقاتل على المياه
أعلم يقينا ان مشكلة المياه لن تحل فى ظل هذا النظام الصيونى الغاشم فلن يسعى ابدا هذا النظام الى راحة الشعب بعد ما أسقاهم لمدة 30 عاما ذل وهوان وخنوع اذا فلن نترجى هذا النظام .
فالسبيل الوحيد لحل كل المشاكل التى وضعنا فيها هذا النظام هو مقاومة انظام نفسه وليس كل مشكلة على حدا
فأسقاط النظام هو الحل الوحيد لكل تلك المشاكل أسقاط النظام واستبداله بنظام ديمقرطى حر هو الطريق للخروج من كل تلك النكبات التى نعانيها على الصعيدان الداخلى والخارجى
وهناك ايضا حل مجاور لهذا الحل وهو التنبه الشعبى لمشكلة المياه محتاجين نعمل عملية ترشيد عام للمياه عندنا بعض الاقتراحات:-
بالنسبة للفلاحين نقولهم يحاولوا شوية ياخدوا مياه على قد المطلوب والى يقضى الغرض بس وكمان المياه اللى بتتفتح فى الحدائق العامة لو لاقينها مفتوحة نحاول نوصل اننا نقفلها
وكمان العمال فى المصانع وسحب المياه اللى ساعات بيبقى فيه أهدار الاف اللترات من الماء نحاول نقلل الاستهلاك
كمان يا جماعة اللى يشوف حنفية مكسورة يسعى أنه يصلحها
وهذا مما امرنا به الله سبحانه وتعالى من امر بمعروف ونهى عن منكر  فأهدار المياه هذا امر منكر يجب النهى عنه
كمان ياريت اللى فى المناطق الشعبية زى حالتنا يحاول يوفر فى حنفيات المياه العمومية ويروح يكلم الناس اللى هناك ويفهمهم ويوعيهم
وياريت اللى فى أى فصيل سياسى او نشاط اجتماعى يبدء يحث على حملة من اجل ترشيد استهلاك المياه سواء بطبع بانفليتات او يافطات تعلق فى المقرات ويبدء فى التوعية العامة لمن حوله والحث على هذا الامر
لا غسيل عربيات بأسراف
لا رش مياه امام المحلات
لا الافراط فى الاستحمام ولا المياه المستهلكة فى البيت
تحديد والتقليل من مياه الوضوء بما يكفى الحاجة فقط
طبعا واجب كل واحد فينا انه يتكلم وينصح من حوله ويبدء بنفسه ماتشوفش حد بيعمل حاجة من الحاجات اللى فوق الا وتكلمه وماتتكسفش وفهمه بالراحة ووعيه بالكارثة اللى احنا داخلين عليها وربنا يعيننا فى تغيير هذا النظام الخائن .

مصر حلوة

أصل المحبة بسيطة ومصر تركيبة 
ومصر حلوة ومُرَّة وشِرْحة وكئيبة

تميم البرغوثي

ثورة مصر

اللي يخون دم الشهدا يبقى عدونا

ثورة البحرين

كل الناس بتتكلم عن كل الثورات، حتى هبل الامريكان، وتشرد الانجليز وماحدش بيفتح بقه على البحرين، مع انهم لسه شغالين لحد دلوقت، وحسبي الله ونعم الوكيل على كل من ساعد في اظلام الدنيا على صراخ المساكين.



شعبك كأنه سما والدنيا دي مطره

يا شعب مصر اللى سابقة ضحكته غضبه
ما يطلع الصبح إلا وصحبتك سببه
يا مخلص الأرض من وحشتها فى الأكوان
يا حجة الشمس تفضل طالعة ساعة كمان
مستأذنة وهى مش عادتها الاستئذان
متونسة بالميدان وبعشرته ونسبه

يا شعب يا مصلي قدام العساكر صف
يجري الجريح من ورا لقدام
لا خاف ولا خف
تدوس عليه العربية تحوله لميت الف
يا للعجب يقتلوه ويتوقعوا هربه
يا للعجب يقتلوه ويتوقعوا غيابه
اللي اتقتل لسه واقف هو واصحابه
ما بهدل الامن غير من ماتوا واتصابوا
والصبح ما نور الا اما الشموس غربوا
اضرب عليا انا مش جاري يا قناص
من امتى خوفنا يابن الكلب ضرب رصاص
كل اللي شاف الشهيد بقى تاره تاره الخاص
الدم صاحي وعنيد ولا تقبلوش تربه
يا شعب ياللي دفع تمن الشوارع دم
احفظ اسامي اللي ماتوا في الشوارع صم
الشارع اللي اصطفى وقصر الامارة لم
ملوك قليلة الرباية ركبوا واتركبوا
شعب بغزالة اتخنق قلب التاريخ في يومين
لابس عباية جحا وهو صلاح الدين
بيكرم الانبيا ويهزأ السلاطين
والفجر خيله وحبات الرمال عربه
يا شعب مصر اكم فرعون وفرعونة
ضربتهم ضرب سجادة في بلكونة
ضرب الملوك تربية صالحة ومضمونة
ما يبقوا بني ادمين الا اذا اضربوا
ضرب الملوك مصلحة
ضرب الملوك تأديب
محلى المماليك وهي بتجري في السراديب
ولولا ضرب شجرة الدر بالقباقيب
مابين اغا وباش اغا كان التتار غلبوا
بعدين مبارك سادات فاروق ماحدش دام
هو احنا شعب كده ما بيعيشلناش حكام
عقبال جيرانا وحبايبنا كمان يا سلام
لو كل من له رئيس نصحى نلاقيه قلبه
يا مصر لسه ولسه الثورة بلة ريق
ما ينتهيلك طريق الا ويبدا طريق
يا شعب مصر تعالى نتفق يا شقيق
رج الملك قبل ما تنعم عليه بلقبه
رجه كده شوفه ان كان الملك شغال
واسأل عليه المكوجي واسأل عليه البقال
واهم حاجة في صفاته انه يكون يتشال
متربي عال لما يمشي يلتزم ادبه
بتكون في احسن حالاتك وانت مش محكوم
بتبقى رايق ولا ظالم ولا مظلوم
بعدين ده ايه الغبي ده اللي يهددك بالشوم
يا مخلي الف احتلال ينزل على ركبه
يا شعب انت اللي كارم كل من حكمك
الدولة دي عارفة تحكم بس من كرمك
كشر لها وهي حتجيلك تبوس قدمك
مافيش حاجة اسمها مليون راجل اتغصبوا
سايق عليك النبي ما تقول كفاية يا شيخ
الملحمة لما تخلص يبدأ التاريخ
وبكرة جاية حروب فيها بكا وصريخ
وبكرة نصرك يخض الشمس من لهبه
سايق عليك النبي ما تقول كفاية كده
من النهاردة انتصاراتك حتبقى كده
يا شعب مصر اللي رجالته وبناته كده
حلال عليه لبن العصفورة لو طلبه
سايق عليك النبي ما تقول كده كفاية
إفرح وكمل وما تقولشى كده كفاية
الثورة دى بداية زى الهجرة والميلاد
الثورة دى بسملة كمل بقى الآية

مع كل مرة قراية حسنها يزداد
والآية تجرى تسلم أختها الراية
من غير نهاية وحتى الوقف مش معتاد
وبكرة أيامنا تبقى حكاية ورواية

عن ناس يباتوا حفايا يصبحوا أسياد
خمسة وعشرين يناير يا شباب حصل ايه
لو قلنا يعنى على الساعة تلاتة الفجر
فى حد فينا طِوِل أو جد حاجة عليه
أو جاب سلاح أو ملايكة بشروه بالنصر
كان اختلف فينا إيه عن أى يوم قبليه
نمنا غلابة، صحينا احنا ولاة الأمر
كان عرش مصر ف أُوَضْنا واحنا ناسيينه
راميين هدومنا على شماله وعلى يمينه
طردنا عنه الحرامى غصب عن عينه
ونزلنا ع الميادين بإدينا شايلينه
بقوا الملوك فى الشوارع والعبيد فى القصر
وف يوم وليلة اكتشفنا ان احنا والنبى مصر
ومصر مش حد تانى غيرنا يعنى يا بيه
وكل واحد سأل طب كنا ساكتين ليه
وشعب مين اللى كانوا الزُّطِّ حاكمينه
بدولة شومة ومختومة بختم النسر
وكل واحد قرا اللى كان على جبينه
رفع بدمه يمينه هْدية وهداية
لو كانت الأنبيا ع المية مَشَّاية
لاجلك يا مصر مشينا باسمين ع الجمر
يا مصر وافتكرى أصل الدنيا نسايه
الملك ده حقنا ومفيش فراعنة جداد
إفرح وكمل وما تقولشى كده كفاية
الثورة دي بداية زى الهجرة والميلاد

مش بس مصر اتغيرت من وقفة الميدان
فيه مساحة ضلمة نورت فى طبيعة الإنسان
فيه حاجة ف طبيعة البشر زى السمع زى البصر
زى اكتشاف القدرة ع الطيران
فيه حاجة كت ضايعة وبانت
خلت الأمة استعانت
عالشقا بالله فهانت
هذه الدنيا على الفتيان
ارقينا وارقيهم يا عم الشيخ
فى حاجة خلت يشمك التاريخ
ينزل عن الوجه الجميل فيبان
والخلق كانوا مدركين
لكنهم مش كلهم متأكدين
لحظة ما شافوا بعضهم جوة المظاهرة
اصبحت واضحة وظاهرة نعمة الرحمن على المستضعفين
وصلت رسالة ربهم من كل زهرة كل زفرة
كل نفرة كل زحمة في كل حارة او خناقة في الاشارة
كل كلمة حق
او ضحكة ولد او بنت
كانت دعوة مستورة الى العصيان
فى حاجة أصلا فى الطبيعة تدعو للثورة على السلطان
شوف الشجر رغم الحجر طارح ثمر زى الخبر وبتعلنه الأغصان
شوف الهوا حب اللِّوا فبقوا سوا هبَّة لها ألوان
شوف القمر يفضل قمر تحت الحصار
رغم اقتناعه إنه هايموت قبل ما يشوف النهار
تحصل مفاجأة تطلع الشمس ف حضوره
يختلط نورها بنوره
تشبهه ما تقولش واحدة من ولاده
هى معناه وامتداده
واخدة منه الموهبة والبغددة
وعشان كده
لغة يقولوا عنهم القمران
شوف النجوم ما لهاش نظام حاكم
تكسر كلمة العالم
يبص ويبقى مش فاهم
وهو شايفها ماشية بكيفها فى الأكوان
يا سما هويتك
انت بيتي وقلبي بيتك
تشبهيني واشبهك بالمعنيين
الشبهة يعني والشبه يام النجوم الفلتانين
وباموت انا في فلتانك الامني
لإنه عبقري وفني
وفيه منطق من الموجود في كل جنان
وبرضه باحبه بس كده عشان فلتان

فيه حاجة غامضة بتكتشف
هى اللى بتخلى الحصان اللى اتحدف
من بطن أمه ولسه مش عارف يقف
يقزح ويجرى ويعرف انه حصان
فيه حاجة بتخلى السجين المستكين فى كل حين اشطر من السجان
فيه حاجة بتخلى القوى عيِّل قوى وبيتلوى من نكتة الغلبان
فيه حاجة بتخلى عيون الخلق ما تنامشى
وبتخلى المدن تمشى
وتخرج زى كلمة حق من غير قصد مابترجعش لو طلعت
وم الأسمنت والأسفلت يفلت فلت نهر مقدس الجريان
فليحذر السلطانُ زحف الغابة
والورد إذ يستأنس الدبابة
داب الحديد من لمسته دوبان
فيه حاجة خلت خطة الموت ترتبك
عابس وعايز يشتبك
خاف من ضحية جاية ناوية تاخده بالأحضان
وإذا بهذا الفجر يا اخواننا اتولد بيننا
وكنا احنا بنستنى وهو كمان بيستنا
واتاريه بس عايز إذن منا وهو فى يميننا
فلما أذنا خد منا وعطانا أمان
يا فجر يا سابق صياح الديك
يا شعب يا مشبك إيديك فى إديك
وكأنها خط الثلث فى آية القرآن
إديت لآدم معنى تانى زاد على كل المعانى
وربنا قال هو ده قصدى وده غرضى
كده بالظبط لا زيادة ولا نقصان
يا مصر وانت لسه في البدايات
بكرة اللي جاي اعظم م اللي فات
يا مصر قومي وبصي في المرايات
كان كل واحد في الميدان جايب معاه مراية
رافعها للسما
اشكال والوان كلها مرفوعة في العالي
صبحت مراية واحدة بتلالي
وبقت يا مصر الارض صورة للسما
لعبة بازل متكاسرة الاجزاء
لما البشر يتجمعوا تبان السما ع الارض
واما البشر يتفرقوا تلقي السما بتنفض
تبقى سما متوزعة جوه الشقق
وتمر ليلة من التوجس والقلق
وننام ونصحى تاني يوم
ترجع سما لما البشر يتجمعوا مع بعض
يا مصر حقك تملكي بدل السما اتنين
واحدة هدية وواحدة تانية صانعها مصريين
يا مصر لو دققتي حتلاقي البراق
بيجر عربية فواكه في الحواري الضيقة
شوفي الصحابة والحواريين على القهوة
بيتناقشوا بحرارة
والسما على مد ايدهم مستشارة طيعة ورقيقة
شوفي المساجد كت تشاور ع السما
صبحت تشاور ع البشر وتقول اهما يا سما
بصي وشوفي
وابقي قول لكل صوفي
وهو طالع لك طريق المعرفة اتغير
يوصل م السما للارض
لا يتوه ولا يحير
وشوفي الخلق وسط الموت تقابله وهي بتهزر
فيتلخبط ويتبعتر
وسر الدنيا يتفسر
ونعدلها ونوزنها
باقول يا مصر قومي وبصي في المرايات
في سما الولاد هم اللي عاملينها
بيشوفوا بعض في وش بعض
كأن انا انت وهو انا واحنا الكل
احنا ف مرايا بعض بنصبح صباح الفل
افدي بروحي كل واحد في المرايا طل
افدي الشهيد اللي بيتبسم
الفجر توب على قده متكسم
والله اعلم مين من الاتنين في صاحبه حل
افدي اللي سهران ع الخيم في الطل
وافدي اللي واقف يشتغل في الضل
وافدي اللي شايل للعناد اشارات
يهدي التاريخ صوب الميدان لو ضل
وافدي اللي واقف هاري نفسه كلام
وافدي اللي يتريق على الحكام
وافدي اللي رايح جاي ما بيتعبش
وافدي اللي جنبه حط فرشة ونام
وافدي طويل البال ما يتعصبش
وافدي المصاب اللي شوية وطاب
وافدي المصاب بهوى التراب وما طابش
وافدي اللي صاب البلطجي وما اتصابش
وافدي المقام العالي في التحرير
دولة بلا امرا وشعب امير

اعلم يا هذا الجيل ان الوطن بشره
لو مصر مالهاش نيل كان شعبها حفره
مش وصلوا بحرين وبنوا جبال اتنين
وف ظرف أسبوعين على خوفهم انتصروا
والخوف ده شىء معروف بيفرعن الحلوف
رزق الملوك الخوف من غيره يندثروا
رزق الملوك بقشيش من خوفنا شعب وجيش
ومفيش ملك بيعيش لو شعبك افتكره
ناس لسة فى العشرين نازلين على الميادين
بيهزأوا السلاطين من غير ما يعتذروا
يا شعب يا مجنون
علم شعوب الكون
اللي اخترع فرعون
قادر يجيب خبره
يا سادة الايام يا رافعين الهام
من بكرة بر الشام نادر لكم شجره
نادرها تين وزتون فى القدس ينتظرون
جيش ع الغلابة حنون وعلى العدى ضرره
دافعين تمنها دما
يا امة الكرما
شعبك كأنه سما
والدنيا دي مطره

يا مصر حمد الله ع السلامة

مطر ونازل بدون غمامة
مطر يا سيدي نازل وطالع
كأنه مدنا والارض جامع
والارض دي مظاهرة في الشوارع
تسقي السما جدعنة وشهامة
مطر وطالع يقول لربه
الامهات اللي في مصر ربوا
ويا بنات مصر قوموا حبوا
اجمل ما في الراجل الكرامة
مطر وطالع ع الفجر يدن
طلعت بنات مصر حلوة جدا
في الحرب والدنيا نار ومعدن
طايرة وشايلة السما اليمامة
خمسة وعشرين من شهر واحد
الفين وعشرة وزادوا واحد
كنا ملايين وكنا واحد
حددنا موعد يوم القيامة

قلت لصحابى انزلوا وانا بعيد عنهم
وقلت من بات فى بيته سلم اصحابه
وانا اللى غبت وهمه اللى هنا اتصابوا
نزلوا الشباب الميدان وانا بعيد عنهم
كسروا الشباب البيبان وانا بعيد عنهم
خرج الشباب م البيوت وأنا بعيد عنهم
دخل الشباب فى الموت وانا بعيد عنهم
يا موتى قوم امتحنى أعتذر منهم
اشمعنى يا كلب تستثنينى من بينهم
يوم الخطر قبلها ما كنت اجبنهم
يا موت تعالى اعوض غربتى ومنفاى
يا موت تعالى أحاسبك ع القديم والجاى
يا موت تعالى ونتقاسمك أنا وعداى
ولا تطال عزوتى وانا بعيد عنهم

بس الحكومة قالت لي انت مش مصري
انت فلسطيني يعني اجنبي حصري
طيب يا بيه يعني بلاد الشام بلاد اروام؟
اعيد كلام قلته ميت مرة ده يبقى كلام؟
مش ام هاشم بلدها السيدة زينب؟
مش الحسين في الحسين ولا لازم له جواز؟
ولا حيختار مابين مصر وعراق وحجاز؟
والمرسي والشاطبي جم م الاندلس الاتنين
من مرسية وشاطبة لو كانوا مش باينين
في اسكندرية اجانب ولا مصريين
اسماءنا هي بلادنا يا حسن يا حسين
اسماءنا زي العلم زي اللغة والدين
اسماءنا هي الوطن له دمنا لو عاز
واسمي خلالي في الارض العريضة ملاذ
وعزوة في كل دار تنطق حروفه تمام
وف كل دار ليا صحبة وليا اهل عزاز
كان نفسي يا مصر يتأكد كلامي بدم
والدم يا مصر برضه ع المحبة قليل
قالوا لي بتحب مصر قلت مش عارف
هو الهوى يبقى جارف لما اقول جارف؟
واقعد أألف أغاني عن جمال النيل
وحكاية الشرب ميت مرة وهرم ونخيل
ولا الهوى الحق هو اللي يهد الحيل
واولى شيء في الهوى يا مصر شيل الهم
ياللي تحب النبي ايدك معانا وشيل
الحب اتقل من اسمه واسمه نفسه تقيل
وفي التباس المحبة ع المحبة دليل
ما تعرف اللي اصابك عشق ولا تعب
والشوق بيقلب مع الحرمان ساعات بغضب
والصبر بس اما يخلص يبقى صبر جميل

يا اهل مصر
وانا اهلي في مصر عرب
اهلي عزازمة وعشايرة الخال وخال الخال
ما بين شراقوة وصعايدة بدو في الحالتين
قولوا لي دولا عرب او دولا مصريين
او دولا الاتنين سوا في الحل والترحال
بعدين انا اسمي تميم وحاروح من اسمي فين؟
مش فيه في مصر قريش؟
قالوا البراغتة قريش
من بيت عدي بن مرة والنسب عمري
حطوا الحدود والعشيرة واحدة في البلدين
وسلك شائك فرق من قالوا ليه او ليش
وكنت اطنش لو ان البحث ده نظري
لكن ده فيه دم سال
واسأل رفح وعريش
واسأل ملوك ترهن الاقصى برغيف العيش
واسأل حدود تحرم المسلم من الحرمين
واسأل في غزة الوف في الحرب متحاصرين
ويخيروني العيال في حب اب وام
انا ابن رضوى ومريد
اسمي تميم من تم
وكل دار للعرب لي فيها خال او عم
واللي يقول غير كده بيني وبينه الدم
مين اللي يثبت ومين يجري يلم الديل
شد الكلام عمته واختار اعز جواد
ورد قاصد بلاده والهوى رداد
وابن الاصول اللي ما يبدل ببلاد ببلاد
والغربة مرة ولو كانت هدومها جداد
في مصر بعد السفر وجد الكلام معناه
واهل مصر صحابي واولياء الله
يا اوليا لسه في العشرين وفي التلاتين
يستنجدوا المؤمنين في المأزمة بيكم
يا فارجين الكرب بين العرب عناوين
منعني عنهم مطار القاهرة واسمي
واني لو جيت يقولوا اجنبي مسكناه
مسكنا واحد اهو له مديح في حزب الله
يتهموا اصحابي بيا مش انا بيهم
واضر لي ستة سبعة اكون في وسطيهم
ع بال ما خلص الكلام ده النصر كان مضمون
القلب فرحان ولكن اتعبه منفاه
وهده بعده عن اللي عاش بيستناه
ما فضلش غير انحني حبا واقول الله
الله افردني عنهم وجمعهم
لكي اراهم على بعد واسمعهم
قد فاز فوزا عظيما من قضى معهم

لما تشوف الشهيد تبقى السلامة خجل
وتبقى عايز تقول له يا أخى آسف
طب قول لى بس اعمل ايه، لو يعنى فيها عمل
اللقمة دى لك نصيب فيها باشيلهولك
واشيل نصيبك من القاعدة وكاسات الشاى
لكن نصيبك فى أنفاسى أشيله إزاى
وازاى أشيللك نصيبك من فرحنا الجاى
ساعات ألاقينى باطلب خط محمولك
بعمل فى نفسى كده ليه، لسه مش عارف
وروح على القهوة أسأل، هو جه وسأل
من قال لك الموت طبيعى يبقى مش شايف
الموت ده شىء مش طبيعى الموت ده أصله خلل
الأصل فينا الخلود وهييجى يوم نلقاه
ما تحسبوش الشهيد اداكوا بس حياة
ما موتوش هو وحده اللى برصاصة رماه
ده طخ ابنه اللى لسه ما اتولدش معاه
وطخ أولاد ولاده لآخر الأيام
موت معاه بشرية كاملة محتملة
عدوا بقى فيها كام شاعر وكام رسام
وكام طبيب عبقرى بين الأطبة إمام
وفيلسوف له على حكم الليالى كلام
وبنت نظرتها تشفى القلب من داؤه
فى شعب كامل رحل ما عرفش أسماؤه
فيجسم كل شهيد فيه مصر مكتملة
فخلوا مصر اللى فاضلة تعيش كما شاؤوا
 
نوارة نجم