يعنى ايه كوكب تانى ؟؟؟

حد مرة سأل نفسه : يعنى ايه كوكب تانى اللى فى اسمى دى ؟؟؟

انا فى ناس سألتنى كتير قبل كدا" يعنى ايه كوكب تانى" !!!؟؟؟

كنت بجاوبهم ببساطة :" يعنى شايفة نفسى مختلفة عن باقى الناس "
وكنت بفكر ان كدا الفكرة وصلتلهم ، اه كنت متوقعه ان مش دايما الفكرة الصح اللى وصلتلهم ,لكن على الاقل يفهمو انى مختلفة ، يفسرو دا بقى انه غرور انه هروب انه اختلاف انه اى حاجة المهم انا عملت اللى عليا ووصلتلهم الفكرة ...... بس النهاردة اكتشفت ان الفكرة لسه موصلتش حتى لاقرب الناس ليا .

هقولكم شوية حاجات اتمنى ان الفكرة بعدها توصلكم :

مش كل اللى ينفع ليك ينفع ليا والعكس صحيح .. مش كل اللى انت مقتنع بيه بالضرورة انا اقتنع بيه والعكس صحيح .. مش كل اللى بيسعدك ممكن يسعدنى والعكس صحيح .. مش كل اللى بيزعلك ممكن يزعلنى والعكس صحيح ..مش كل اللى بيدايقك ممكن يدايقنى والعكس صحيح ..مش كل اللى اتربيت عليه بالضرورة اكون اتربيت عليه والعكس صحيح .. طريقة تعبيرك عن احساس ما مش بالضرورة هى نفس طريقة تعبيرى والعكس صحيح.. مش كل العيب عندك بالضرورة يكون عيب عندى والعكس صحيح ..مش كل اللى انت شايفه صح انا شيفاه صح وبالتالى لازم اعمله والعكس صحيح .. ومش كل اللى انت شايفه غلط انا شيفاه غلط وبالتالى انا مش لازم اعمله والعكس صحيح .. مش كل الطرق اللى بتستخدمها فى عمل حاجة معينة هى نفس الطرق اللى تناسبنى وبالتالى انا من حقى اختار الطرق اللى تناسبنى والعكس صحيح 

ظروفك مش زى ظروفى؛ فمتحكمش عليا بالقواعد اللى فى حياتك وبالتالى مش مطلوب انى اكون نسخة منك وحياتى نسخة من حياتك . عشان كدا انا عمرى ما كنت بحب طريقة الاقناع فى التعامل مع الناس.. لا بحب اقنع حد ولا بحب حد يقنعنى .. لان انا معرفش انا كدا بضره ولا بفيده.. هكون سعيدة جدا لو انه اخذ قرارته بنفسه ونبعت قناعاته من نفسه ..وهكون اسعد لو الناس هى كمان سابتنى اخد قراراتى بنفسى
 سابتنى اجرب واغلط واتعلم ..

عارفين المقولة اللى بتقول " انت حر ما لم تضر " انا شايفة ان اللى قال المقولة دى شخص فاهم  كل الحاجات اللى قولتلها .. شايف نفسه كوكب تانى وفاهم انه فى كوكبه ظروفه مختلفة عن اى كوكب تانى وبالتالى هو بيرسم مسار حياته بالطريقة اللى تناسب ظروفه وشخصيته ... مالم يضر بالكواكب التانية .

بعد كل اللى انا قولته دا هسأل الناس سؤال وعلى اساس اجابته هطلب منهم طلب :

السؤال : فهمت يعنى ايه كوكب تانى ؟؟؟

الطلب : طب لو فهمت تقدر تعاملنى على انى كوكب تانى ؟؟؟

 والسؤال دا ليك انت " انت كمان مش شايف نفسك كوكب تانى   ؟؟؟ "