بشبـــــــــــــه عليـــــــك

بشبه عليك
ملامحك من ملامحي
و لونك لونه قمحي
و عيونك فراحنين

بشبه عليك
قولي و فكرني امتى
أنا شفتك بس امتى
من يوم ولا سنين

يمكن زمايل مدرسه أو دفعتي في الجيش
خبطت كتافنا يوم في بعض و احنا في طابور عيش
و لا أكلنا سوا أكلة سمك في أبو قير

جايز صليت جنبك في يوم الجمعه في الحسين
ولا في يوم شيلنا العلم في الأستاد من سنين
و لا لمحتك يوم هنا تصرخ تقول تغيير

بشبه عليك
ملامحك من ملامحي
و لونك لونه قمحي
و عيونك فراحنين

بشبه عليك
قولي و فكرني امتى
أنا شفتك بس امتى
من يوم ولا سنين

يمكن في ليلة وقفتلي و أنا عطلان على الطريق
سألت عني في يوم و أنا مخنوق حاسس بضيق
سايبني ليه محتار كده ما تقوللي تطلع مين

هو انت أحمد ولا جرجس ولا صوت ملايين
ولا واحد صدره ضاق من الظلم والظالمين
و لا أنت باعتك ربنا تاخد بإيد ملايين

بشبه عليك
يا اللي ضحيت بروحك يا واحد مننا
وسايب أهلك وناسك علشانا كلنا
يا شهيد انتا مكانك في الجنه مش هنا

كان نفسي بس أقولك انتا مرحتش هدر
دلوقتي صوتنا عالي و خلاص خوفنا انكسر
بقا في قلوبنا رحمه وليلنا بقا فيه قمر
بشبه عليك