بس نفهمها

لما تبص حوليك فى كل الاتجاهات وتشوف صوة واحدة  .. ولون واحد .. إسود فى إسود .. دا معناه حاجة من اتنين (أو تلاتة) يا إما النور قطع أو أنك فقدت البصر لا قدر الله ... أو إنك عندك اكتئاب رهيب .. طبعا أول وتانى حاجة مش هتقدر تتصرف فيهم .. إنما موضوع الاكتئاب ده أكيد ليه حل ..

سمعت فريد يشدو مؤكدا إن الحياه حلوة .. بس .. آه من بس دى .. تخيلو كيف تكون الحياة بدون هذه الكلمة القصيرة المكيرة .. كلمة من حرفين ولكنها لديها قدرة عظيمة على تدمير جمل تسبقها ...

تخيل عروض شركات المحمول من غير "بس" .. موبينيل هتديك عشرين دقيقة "بس" من موبينيل لموبينيل  .. فودافون هتديك رصيد زيادة "بس" لازم تخلصه فى خلال شهر .. الحكومة هتزود المرتبات بس هتغلى البنزين .. عايزة اقول امثلة اكتر كمان "بس" خايفة تقولو عليا رغاية ..

فريد بأه كان طيب جدا فى ال بي بتاعته .. الراجل قال الحياه حلوة .."بس" نفهمها .. وبما إن الاغنية قديمة ورغم كده الرقابة مش معترضة عليها ... يبقى كلامه صح والحياة فعلا حلوة ..بس مطلوب منى بأه إنى افهمها .. وبدأت أستخدم ذكائى عشان أفهمها .. وتانى يوم وانا نازلة الجامعة وفى الطريق وجدت الوصفة السحرية و اندهشت إزاى الناس مش شايفة الحل رغن انه متعلق فى كل الشوارع " احسبها صح .. تعشها صح " وقلت فى سرى يالروعة حكومتنا  .. إنها تقدم لنا نماذج مشرفة تمكنت عن طريق حسبة صحيحة من رؤية حياة حلوة جميلة ..

عندك مثلا الست سعاد اللى بطلت تاكل عشان تجيب لبس لولادها .. يا لعزيمة المصريين أحفاد الفراعنة .. ووفاء اللى وفرت فلوس الدواء عشان تجيب لابنها لعبة .. كم انتى عظيمة يا وفاء  ..

وساكتفى بالمثالين دول خوفا من إنى الاقى إشادة بعم حسن اللى باع ابنه التالت عشان وبثمنه اشترى بلاى ستيشن لإخواته الاتنين ..

فكرت شوية فى سبب المشاكل الموجودة فى العالم ولقيت ان أتخن المشاكل حلها سهل جدا ... السبب الرئيسى لأى صراع هو تعارض المصالح وحل المشكلة دى مش فى تجنب هذا التعارض ولكن فى القضاء على المصالح نفسها ..

ولو شوفت صورة لكوكب الأرض من الفضاء هتلاقى إن الحدود بين الدول مش موجودة ولكن فى واحد ابن حلال هو اللى عمل الحدود دى وهى سبب كل مشاكلنا تقريبا .. تخيلو لو كان فى دولة واحدة اسمها " جمهورية الأرض ".. كنا ساعتها هنوفر اللمليارات اللى بتتصرف على الجيوش لسبب واحد .. إن أساسا مش يكون فى حاجة اسمها جيوش .. وبالفلوس دى كنا هنحل مشاكل الفقر والجوع المرض ونستريح من قناة الجزيرة كمان .. ولكن الانسان هو اللى صنع مشكلة بحبكة درامية يصعب حلها  .

اما على المستوى الشخصى فلما فكرت فى ايه هى مشاكلى دلوقتى حالا .. لقيت إن أنا السبب فى معظمها ..واخرها إن أنا اللى بدأت أكتب البوست ده وبالتالى مطلوب منى أخلصه ..   

ولكن السؤال الأهم .. هل فعلا المشاكل هى اللى بتخلى الحياة صعبة كئيبة .. هل حياتنا من غير مشاكل أجمل .. انا عن نفسى مفتكرش  .. حياتنا من غير مشاكل هتبقى زى " طالب كل يوم بيزاكر أمثلة محلولة مكررة وفى احسن الأحوال إذا لم تكن مملة ستكون غير مفيدة" .. ورغم إنى مجربتش ده بس أعتقد إن "المشاكل هى ملح الحياه" ..

المشكلة إننا بنعتبر المشكلة مشكلة رغم إنها فى الواقع مش مشكلة ..

أنا مثلا فضلت أفكر فى الجملة اللى فاتت عشان أكتبها بأسلوب أحسن رغم إنى أعتقد ان كلكم فهمتوها بسهولة .. أنا شايفة إن كل مشكلة هى عبارة عن فرصة للنجاح .. فرصة للابداع زى ما بيقولو الحاجة ام الاختراع .. ولو حتى لو كانت فرصة للفشل .. ممكن نتعلم من عمنا إدسون اللى عمل التجربة مائة مرة وفشل ونجح فى المرة المائة وواحد .. والاهم إنه فى كل مرة كا بيتعلم من المرة اللى قبلها .

الناس فى النمارك والسويد بينتحروا عشان مفيش عندهم مشاكل ولأن حكوماتهم الفاشلة حلت كل مشاكلهم .. عشان الناس بس تعرف إننا فى نعمة مش حاسين   بيها ..